Job 40

1 Sohp, ke peliandahr Koht, Wasa Lapalap;
Ke pahn nennenlahr met, de ke pahn sapeng ie?
Sohp

3 Maing KAUN, ei pato kat patohn pweipwei men. Dahme I kak sapengkin komwi?
Pwe sohte.
5 Ei pato me laudsang me konehng.
6 Eri, KAUN-O ahpw ketin pwurehng mahseniong Sohp sang nan melimelo, mahsanih,

KAUN-O

7 Ma kowe ohl emen, kesihnenda
oh sapeng ei peidek kat.
8 Ke songosong kadehdehda me ngehi me sapwung—
ke wiahki me ngehi me sapwung oh kowe me pwung?
9 Ke me kehlail duwehte ei kehlail?
Ngilomw en kak ngirisek en nansapwe duwehte ngileiet?
10 Ma iei, a uhda, kawauwihiukala oh kaileiukada;
kapilkinuhkpene roson oh lingan.
11 Ke ahpw kilang irail kan me kin aklapalap;
kauwong irail angin omw lingeringer oh kasaroweiraildi.
12 Ei, tehk mwahu duwen irail oh kasapwiliraildi;
kamwomwala me suwed akan wasa koaros me re mi ie.
13 Sarepedi irail koaros pahn pwehl;
salihiraildiong nan sapwen me melahr akan.
14 Eri, I ahpw pahn tapihada kapingaiuk,
oh pohnese me pein kowe me pweida.

15 Ke kin kilang soangen mahn kamasepwehk me adaneki Pehemod? ^{▼▼ PEHEMOD: Ekei aramas medemedewe me mahn menet duwehte hippopotamus, ekei kin medemedwe me mahn en kawa men.}
Ngehi me wiahda duwehte ei wiaiukada.
E kin kang dihpw duwehte kou kan,
16 ahpw ia uwen kehlail en paliwere,
ia uwen kehlail en kapehde!
17 Pwadaike kin uhda, likamw tuhke sidar pwoat;
selen neh kan rasehng sel mete kehlail.
18 Tih kan rasehng prons,
oh neh kan rasehng lepin mete kei.

19 Mahn keieu kapwuriamwei rehn mahn koaros me I wiahda!
Ihte Sounwiepeo me kak powehdi.
20 Dihpw me e kin kangkang pwe en keirkihda kin wosada pohn dohl kan,
wasa me mahn lawalo kan kin mwadomwadong ie.
21 E kin mihmi pahn mwetehn tuhke tekatek kan,
oh kin rukuruk nan welin ahlek kan nan lehpwel kan.
22 Tuhke tekatek kan oh tuhke me kin wosada pohn keilen pihl kan
kin pwainkihdi mwetehr kan.
23 E sohte kin masak ahden pillap,
e kin nennenlahte ma pilen Sordan kin lapakehda lel ni mese.
24 Ihs me kak karotongehla mese oh saikidi?
De ihs me kak koledi mahn menet nan eh lidip?